「黃圈」售鳳梨貴過街市 「黃絲」變水魚蠢到加零一

  早前「台灣鳳梨」被禁止輸入內地,有唔少「黃店」同組織就以高價出售「台灣鳳梨」,話就話係呼籲「手足」撐台灣農民喎,實際上扮黃「搲撈」。不過成班「黃絲」就信到啲「黃店」十足十,結果做咗水魚都唔知。

  話說日前「西貢青年舍」喺fb宣傳預購「台灣鳳梨」,標明每個價值30蚊,為咗氹班「黃絲」幫襯,佢哋就話:「3月係『台灣鳳梨』嘅收成期,一句話唔要就搞到台農企咗喺度,有香港人無咁易!」仲強調:「是次團購純義務性質,不賺分文。」之但係一個鳳梨賣成30蚊,明眼人一睇就知唔合理。fb專頁「正視2.0」就圖文並茂咁踢爆:「好似今日,又有台灣鳳梨搵你『扮賊』嘅case,食盡人血饅頭,明明街市買個鳳梨先25蚊個,搵(搵)你買仲要30蚊個,真係攞你命。」睇真啲,「西貢青年舍」同街市所賣嘅係一模一樣,點解佢哋會賣貴啲?唔通就因為係「黃」背景?對於「西貢青年舍」賣「台灣鳳梨」一事,「Doris Tai」就話:「等佢哋自己人呃自己人都好,總好過破壞社會。」

  學「正視2.0」話齋,咩都掛個顏色出嚟就賺到錢,真係易過借火,難怪「黃色經濟圈」會畀人叫做「黃色水魚圈」啦!