霍朗齊爭食血饅 硬銷「律師團隊」可勝訴

因涉嫌協助「12逃犯」干犯香港國安法嘅「獨立音樂人」霍朗齊,日前喺fb發帖爆料,話一啲「知名律師」屢次叫喺修例風波中被捕嘅「手足」認罪, 自己可以因此「做少啲嘢」,同將所謂「612 人道支援基金」嘅錢「袋袋平安」。佢鬧爆嗰幾位大律師、事務律師,一個搞到青年「手足」坐三年,又令學生被告間接患情緒病;另一位令到未成年被捕者變咗通緝者。霍朗齊又話,嗰啲知名律師接見時間短,要被告及家屬自己搵證據,又唔畀家屬問問題。

鬧完一輪,佢就順手推銷自己嘅「律師團隊」,話如果被告轉手到佢嘅「律師團隊」就可以勝訴,即時被無罪釋放喎。其實,霍朗齊之前經常喺fb標榜自己多次協助被捕「手足」,又話陪「手足」上庭、跟獄中「手足」通信、幫失業「手足」搵工,舊年仲話:「官司三連勝!我團隊邁向四連勝。」可見佢都係為爭生意,唔該班「黃絲」唔好咁天真啦。